حصري مين اللي راكب المركب والمركب عماله تكركب..

((حدوته للاطفال))

كان يا ما كان فيه فارة عايشة على شطّ النهر

و في يوم من الأيام حبّت تعدّي النهر عشان تزور عمتها اللي ساكنة على الشط التاني، لكنها مكانتش لاقية حاجة تركبها عشان تعدّي فيها النهر.

قعدت الفارة تدور وتفتش لغاية ما لاقت قشرة بيضه

قامت راكبة في قشرة البيضة وقعدت تجدّف في النهر بعود كبريت.
وبعد شوية سمعت صوت بيقول: مين اللي في المركب والمركب عمالة تكركب؟
ردت الفارة وقالت: أنا الفارة، وإنت مين؟
- أنا الصرصارة

- عايزة إيه يا صرصارة؟

- عايزة أركب معاكي

- طيب يالا تعالي نطي

نطت الصرصارة في قشرة البيضة، وفضلوا يجدّفوا، يجدفوا، والنهر يعمل : ووش ووش ووش

، لغاية ما سمعوا صوت بيقول:
مين اللي في المركب والمركب عمالة تكركب؟
قالوا: إحنا الفارة والصرصارة، وإنت مين؟
- أنا الفرخة الحمرة النقارة

- عايزة إيه يافرخة حمرة و نقّارة؟
- عايزة أركب وياكم
- يالا تعالي نطي
و نطت الفرخة في قشرة البيضةوفضلوا يجدفوا ويجدفوا والنهر يعمل:ووش ووش ووش

لغاية ما سمعوا صوت بيقول : مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة، وإنت مين؟
- أنا الديك اللي بيدّن في السحّارة ( يعني الفجر)
- عاوز إيه يا ديك؟
- عاوز أركب معاكم
- يالا نط
و نط الديك في قشرة البيضة، وفضلوا يجدفوا، والنهر يعمل وش وش وش

لغاية ما سمعوا صوت بيقول : مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة والديك اللي بيدن في السحّارة، وإنت مين؟
- أنا الخروف اللي بياخدوا منه الصوف
- عاوز إيه ياخروف؟
- عاوز أركب وياكم
- يالا نط
و نط الخروف في قشرة البيضة، وفضلوا يجدفوا ويجدفوا، والنهر يعمل وش وش وش

حصري مين اللي راكب المركب والمركب عماله تكركب.. 12990028101658

لغاية ما سمعوا صوت بيقول: مين اللي في المركب والمركب عمالة تكركب؟
- إحنا الفارة والصرصارة والفرخة الحمرة النقارة والديك اللي بيدّن في السحّارة والخروف اللي بياخدوا منه الصوف، وإنت مين؟
- أنا الفيلفلفيلوه أبو زلومه طويله
- عاوز إيه يافيل؟
- عاوز أركب معاكم
- يالا نط
و نط الفيل في قشرة البيضة، وفضلوا يجدفوا و يجدفوا، والنهر يعمل ووش ووش ووش،

لغاية ما سمعوا صوت رفيع خالص بيقول: مين اللي في المركب والمركب عمالة تكركب؟
- إحنا
الفارة والصرصارة والفرخة الحمرة النقارة والديك اللي بيدّن في السحّارة
والخروف اللي بياخدوا منه الصوف والفيل فلفيلوه ابو زلومه طويله، وإنت مين؟
– أنا البرغوت اللي بيقرص بالنبّوت ( من شدة القرص)
– عاوز إيه يا برغوت؟
– عاوز أركب و ياكم
– يالا نط
ونط البرغوت في قشرة البيضة وقعد يقرص فيهم و يقرص فيهم لغاية ما انقلبت المركب ووقعوا كلهم في النهر،
وفضلوا يعوموا لغاية ما وصلوا الشط التاني

.......ووصلوا كلهم عند عمة الفارة........

حصري مين اللي راكب المركب والمركب عماله تكركب.. 12990029572519

*****
تصبحوا على خير
إذا عجبتكم الحدوته فلا تقولوا شكرآ........ ولكن قولوا جزاك الله خيرآ

» صحبتي اللي مخترتهاش
» حكايات الخنساء الذيذه اللي هتغلب بيها شهرزاد
» الخلايا الجذعية ايه الخلايا اللي ايه ايه