الحب ميّت و القصايد مقابر
و الشوق شخص يشيّع الحب لا مات
و الحزن لوحه تحتويها النواظر
بروازها دمع العيون الحزينات
و الآه صوت اللي جروحه تكابر
و القلب آله تعزف الجرح آهات
و الليل و القمرة و بعض الخواطر
هي سلوة احساس المحبين بالذات
يا صاحبي دامك مهاجر مهاجر
خذ آخر جروحي من القلب بسكات
اخاف لا قلبي يشوفك مسافر
و من الغلا يشتاق و يقول لك هات
هات الجروح اللي بقت لي جواهر
بأعيشها ذكرى اليمة و لذات
ارجوك يا خلي اذا صرت عابر
على الطريق اللي جمعنا بدايات
وقف دقيقة صمت على المشاعر
و اذكر تفاصيل الهوى و الحكايات
و اذكر بعد آمالنا بيوم باكر
و احلامنا يوم النوايا سليمات
و لوحاتك اللي جسدت روح شاعر
و ابياتي اللي تحتوي حب لوحات
و ان خلّت الذكرى دموعك تناثر
كم يوم كنت امسح دموعك ولا بات
الله ياذا الوقت تنهى و تامر
كنك على كل البشر لك وصايات
وش ينفع المشتاق و الحظ عاثر
و الروح ثمله و البداية نهايات
و الحب دايم يبتدي و الاواخر
اما قصايد شوق والا روايات
عزاي في من مات باقي دفاتر
تجمع حروف و تحتوي كل ما فات
الخميس ديسمبر 01, 2011 11:36 am من طرف مهندس/سلامة