سى الراجل زهقان وطفشان ,
سى الراجل غاضب على النسوان ,
مش بس مراته , دى بنت عمه وقريبته وبنت الجيران,
اصله فى يوم فى الشهر اللى فات
,فى حكاية من ضمن الحكايات,
رجع من شغله بدرى ,
لقى مراته بتجرى,
ما بين المطبخ وتحضير الغدا
وبين حموم علي وتمشيط ندا,
راح نازل فيها تلبيخ ,
واخييه ريحتها بصل وطبيخ,
وفى يوم فى الشهر اللى قبل اللى فات,
لما اتأخر 3 ساعات ,
لقاها بعد تعبها فى بيتها اول النهار,
ومذاكرتها لعيالها آخر النهار
, قال ايه قاعدة مستنياه ,
وبكل جرأه تسأل وتتكلم وياه,
انت اتأخرت كدة ليه
هى هتحاسبه ولا ايه ؟!
فقال عليها نكدية وست مش متربية
وأخيرا عشان منطولش فى الكلام
الشهر اللى قبل اللى قبل اللى فات
جاب سمك 5 كيلو
وقالها تقلى وتديله والباقى تشيله ..
الست خدت سمكتين تشويهم..
قال ايه كان نفسها فيهم .
.صرخ وقال دى قلة أدب يا مدام
..وعدم سمعان للكلام..
ويتميز رجلنا بذاكرة قوية ..
قادرة على استدعاء يوم فى الشهر اللى فات..
ويوم فى الشهر اللى قبل اللى قبل اللى فات..
وتستخدم هذه الذاكرة لخلق لنفسه المبررات
وإسقاط التهم على الستات..
ولان الكمال لله فالذاكرة فيها حتة خربانة..
تمسح باقى الشهر وباقى كل الشهور..
وتحفظ كل تقصير والحلو يغور..
والحتة الخربانة مسحت سنين الود والغرام ..
مسحت شهور العسل اللى عملتها المدام..
قبل إنشغالها بالعيال..
وقبل تنحى سى الراجل عن تلك المهام..
ومسحت كمان الشهادة العالية المركونة فى الدولاب..
لان سى الراجل قال بلا شغل بلا هباب..
ويتميز رجلنا كمان بوجود أجنحة طايرة بيه هناك
لكن هنا لا والف لا ..
هناك مع شلة أصحاب وشوية فرفشة..
هناك فى الكافيه نت وحبة دردشة..
وسى الراجل قلبه مليان بالخير..
يعود مريض ويساعد محتاج..
ويحل مشكلة الولهان والمحروم والمشتاق..
الست قالتله ياسى الراجل..
هو برة ضحك وفرفشة وجوة نكد ودشدشة؟..
اللى يزعلك هناك تفوّت وتعدى..
وهنا تفرمل وتهدى..
هى مشاكل الناس تعمللها محلل نفسانى..
ومشاكلنا تعبان نعسان آه يانى..
دة حتى يا راجل يجيلك إنفصام فى الشخصية.
.هوب سى الراجل زعق وثار..
بتقولى ايه يا ولية..
مالك ومالى.. هو دة طبعى ودة حالى..
غورى من وشى الساعة دى.
.ثانية و مشوفكيش قصادى.
معلش ياخويا كان ينقطع لسانى..
إعمل اللى يحلالك مش هنطق تانى..
سى الراجل عامل عليها راجل..
وآآه .........لو يعمل معاها راجل.
الخميس ديسمبر 01, 2011 11:36 am من طرف مهندس/سلامة