حبيبة وعمار فى المزرعه

كان يا ما كان
يا سعد يا إكرام
وما يحلى الكلام
إلا
بذكر النبى عليه الصلاة السلام .

كان فيه عيلة سعيدة ، لها بيت جميل .. فى مزرعة كبيرة وجميلة مزروعة من كل الخيراااات ..

ماما ..بابا .. حبيبه (7 سنين).. عمار ( 3سنين )
كانوا بيحبوا بعض .. وعايشين مبسوطين أوى فى المزرعه ..

بابا بيصحى الصبح يروح يزرع ويشتغل عشان يطلع خضار جميل وطازة ياكلو منه

ويبيع الباقى ويشترى كل الحاجات اللى حبيبه وعمار بيحبوها من الفواكه..

وبعدين .. فى يوم من الأيام حبيبه و عمار ، كانوا بيلعبوا مع بعض فى المزرعة بالطيارة الورق ..

وبعدين ..

جريت حبيبة ورا عمار ..جريت وجريت وجريت ..

وبدأت تغلس أوى عليه ..وتصر على انها تاخد الطيارة ..

أخدت حبيبة الطيارة منه وقالت له :

اشمعنا انت اللى تمسكها ..لو عاوزها اجرى ورايا وخدها ..

عمار جرى وراها ، لكن لأنه صغير ما قدرش يمسكها ..وهى طول ما كان بيجرى

وراها كانت بتضحك ضحك بيضايقوا أوى .. وفضل عمار يعيط .
http://t2.gstatic.com/images?q=tbn:A...ZHcbeBrANP7CoA

لكن حبيبة ما رحمتوش .. وقالت له : خلاص ..دى آخر مرة .. اجرى ورايا بس المرة دى
وانا هاعطيها لك ..

رغم حزن عمار من تصرف اخته لكن قرر إنه يتحداها .. وبدأ يجرى جامد وراها ..
http://t1.gstatic.com/images?q=tbn:A...N7MMd6WJSBoVPW

وبدأوا يجروا يجروا يجروا .. لحد ما بعدوا خاااااااااااااااالص عن البيت ..

حصل ايه يا ترى .....

تابعوووووووووووووووووووووونى

وبعدين ..

انتبهت حبيبة إنها بعدت عن البيت والشمس بدأت تغرب ..

وقفت ونبهت أخوها عمار .. وقالت :

عمار ..الدنيا بدأت تليل ، واحنا بعدنا خالص عن البيت ..

وقف عمار مخضوض شوية وبدأ الخوف يظهرعليه ..

وقالها : وبعدين هانعمل اه ، يلا نرجع تانى ..

لكن حبيبة كانت تاهت خالص ومابقتش عارفة الطريق منين ..وبدأت تخاف أوى أوى ..

وقالت : تيجى نجرب نرجع تانى كده ..

وأخدت إيد أخوها ورجعت يا دوب كام خطوة ...هووووووب وقع عمار فى حفرة ..

اتوترت حبيبة أكتر ومابقتش عارفه تعمل ايه ومش عارفة تجرب ترجع تانى وتسيب أخوها

وبدأت تعيطوتدعى ربنا ينجيها هى واخوها اللى قعد يعيط هو كمان كتير اوى

فى الوقت ده ، ماما فى البيت بدأت تقلق أوى ..

جه بابا وحاول يهديها وقرر إنه يجمع أهل القرية عشان يدوروا معاه على حبيبة وعمار ..

الدنيا بقت ليل أوى ..

وعمار خايف أكتر وهو فى الحفرة الوحشة دى ..

وحبيبة بدأت تسع أصوات الصراصير وتخاف وتدعى ربنا اكتر

وبعدين ....

راح بابا ،جمع الناس اللى فى القرية عشان يساعدوه يلاقى ولاده ..

كل راجل أخد معاه مصباح أو كشاف ينورله الطريق ..

واتجه كل مجموعة تدور على عمار وحبيبة ..

المجموعة الأولى راحت يمين ..

والتانية شمال ..

وبابا والمجموعة اللى معاه راحوا فى اتجاه لعب الولاد ..

وبدأوا ينادوا :

يا حبييييييييييييييييييييييييييبة ...يا عماااااااااااااااااااااااااااااااااار ..

يا حبيبه يا عمار ..

يا حبيبه يا عمار ..

وبدأوا يسمعوا صوت الذئب بيعوى وخافوا أكتر علىالولاد يكون صابهم مكروه ..

http://idrawpictures.files.wordpress...wolf.gif?w=490

عدت نص ساعه ..

ساعه .

ساعه ونص ولسه ماحدش لقى حاجه ..

صوت بابا والجيران وصل لحبيبة اللى كانت نايمة هى واخوها عمار من شدة التعب ..

فجأة .. النحلة قرصت حبيبة ،قامت مفزوعة من النوم ..

وسمعت صوت باباها والناس كلها اللى بتنادى عليها هى واخوها ..

ونادت وقالت : أنا هناااااااااااااااا يا بابا ..انت فيييييييييييييييييييين ..

وصحت عمار ، وقالت له ينادى معاها باباها ..

وقالوا :: يا باباااااااااااااااااااااااا .. يا بابااااااااااااااااااااا

احنا هناااااااااااااااااااااااا ..احنا هناااااااااااااااااااااااااااااا ..

وقربت ناحية النور بتاع الناس اللى جم مع بابا وقعدت تنادى تنادى تنادى ..

لحد ما بابا سمعها وقال : استنوا ..أنا سامع صوت بنتى .. الصوت جاي من الجهة دى ..

اتجه بابا والناس اللى معاه للصوت وشافت حبيبة باباها وجريت عليه وحضنته وهى بتعيط
وتقول :

أنا آسفة يا بابا .. أنا السبب . أنا السبب ..

بابا : فين عمار أخوكى ..؟؟

حبيبة نزلت وجريت ناحيته وبابا وراها ..

طلع بابا عمار من الحفرة ..وحضنه وهو بيبكى ومبسوط إنه وجد حبيبه وعمار من تانى ..

ومسك إيدهم وبدأ يرجع تانى لبيتهم مع الناس اللى ساعدوه ،واللى شكرهم جدا على مجهودهم ..

وصل الولاد البيت .

حضنوا ماما أوى وماما عيطت من فرحتها برجوعهم..

واعتذرت حبيبة على مضايقتها لأخوها وقررت ما تضايقوش أبدا بعد كده ..

ورجعوا تانى أسرة سعيدة فى مزرعه جميلة ..يلعبوا سوا ومن غير زعل ..

وتوتة توتة خلصت الحدوتة ...حلوة ولا ملتوتة ..