(العربية حمرا الشطورة الأمورة )

والنهاردة حدوتتنا لطفل من سنتين كده لحد 4 سنين تقريبا وممكن 5 سنوات ..

وطبعا كل أم ممكن تدور على اهتمامات ابنها وتعدل سلوكياته من خلال التخيل بالألعاب اللى بيحبها ..
وتعلمه الألوان ..أفضل تركزى على لون واحد أو لونين فى بداية تعليم الألوان ..
يلا نبدأ ..

كان يا ما كان ..

يا سعد يا إكرام ..

وما يحلى الكلام إلا بذكر النبى عليه الصلاة والسلام ..

كان فيه عربية جميلة لونها أحمر واسمها حمرا ..كانت جميلة أوى
فى يوم استأذنت من مامتها تخرج تمشي شوية فى الحقول ، وماما سمحت ليها..
وهى ماشية بين الحقول الخضرا والشمس اللى طالعة ،كانت بتقول دعاء الخروج
من البيت :
بسم الله
توكلت على الله
ولا حول ولا قوة إلا بالله العلى العظيم

وهى ماشية قابلت مين يا اولاد ؟؟

قابلت مين يا ترى ؟؟

أيوه ، قابلت الولد أبو بالونات ملونة اللى اسمه بوبو ..

بوبو قالها : ازيك يا حمرا ، عاملة ايه ..

ردت وقالت : الله يسلمك يا بوبو ..ايه البالونات الجميله دي ..أحمر وأزرق وبرتقالى ..

قالها بوبو: تحبى تلعبى معانا..احنا كتيير أوى وكلنا بنلعب فى الحديقة اللى هناااااااااااااااااك دى ..
بالونات ألوان كتييييييييرة ..وبنلعب نط الحبل ..وعجل ..ولف الطوق..وكورة .. وشد الحبل ..

قالت العربية حمرا : لاء يا بوبو ، أنا ما استأذنتش ماما ، وكان نفسي آجى معاك ،
لكن ماما ممكن تزعل منى ..
وقالت : صحابك حلوين أوى ، بس خلينى أنا اتمشي عشان اكون باسمع كلام ماما ..

بوبو قال :شاطرة يا حمرا ، خلاص اسمعى كلام مامتك وانا هاروح عشان مامتى كمان ما تقلقش عليا ....

مشى بوبو ، وفضلت العربية الحمرا بتتمشي ..

وهى ماشية حست بحاجه غريبه ، حاجه وجعتها أوى ..

إيه ده ، ده في مسمار دخل جوه العجل بتاعها ..قعدت تعيط حمرا وماكنتش عارفه تعمل ايه ؟؟

وهى بتعيط ، لقيت الباص الأصفر اللى اسمه (أصفريكو) اخوها جاي من المدرسة ..

وقف وقالها : مالك يا حمرا فيه ايه ؟؟

قالت له على المسمار ..

قالها : ولا يهمك ، أنا عندى الحل ..

قالت حل ايه ؟؟

قال : شوفى أنا كلمت عمو الأصفر الميكانيكى عشان يساعدك و يطلع مسمارك ..
أهو جه أهوه ..

عمو الأصفر قال : أناهاطلع مسمارك وأظبطك وكمان تتغسلى عشان ماما تنبسط منك ..

وبسرعه عمو طلع المسمار ونفخ العجل بتاعها وبدأت تستحمى وتكون نظيفه وجميلة ..

انبسطت أوى الأمورة حمرا وروحت ل ماما ، وحكت لمامتها على صاحبها بوبو
وأخوها الباص أصفريكو وعمو الأصفر اللى ساعدها كمان..

ماما انبسطت أوى من أصفريكو وحمرا ووعدتهم تفسحهم فى الملاهى المرة الجاية ..

وتوتة توتة ..
فرغت الحدوتة..

حلوة ولا ملتوتة

» اللغة العربية ..................
» تحميل قصص أطفال مترجمة باللغتين العربية والانجليزيه مجانا
» رسالة الى الشعوب العربية المتحررة والتي ستتحرر