للتخلص من الحبوب واثارها 100 فى 100

[size=21]شوفوا بقي اثار الحبوب ديه مشكلة كبيرة جدا عند معظمنا
خاصة ان المستحضرات الطبية اللي بنجيبها ساعات عشان
تجفف الحبوب او تشيل اثارها بتسبب جفاف للجلد في مناطق الحبوب ده علي اساس
انها فعلا بتشيلها واكيد طبعا مش بتشيلها من اول والا تاني مرة.
الحل بقي طبيعي 100 % بامر الله تعالي و الا بيسبب جفاف والا اي حاجة بامر الله
بس يالا جهزي الادوات ديه وتعالي معايا.

1- علبة او مجموعة من اعواد الخشب او البلاستيك المتغطية بالقطن اللي بنستعمله ننضف بيه ودانا.
اعتقد سعرها رخيص يعني مش غالية بس مش فاكرة الكام بكام بالظبط .

2- زجاجة واحدة بس من زيت البابونج الاصلي الطبيعي 100 %.
اللي استعملته كان من عند العطار تعبئة شركة الكابتن
سعر الزجاجة 30 ملل هو سبعة جنيه ونص و بس.
(لونه بترولي شوية ما تستغربوش لو فتحتوه لقيتوا لونه غريب).

3- بقدونس اخضر فريش.
من السوق او السوبر ماركت او من البالكونة لو انتي شطورة كده و بتعملي اكتفاء ذاتي (نفسي اعمل كده بس الخيابة بقي معلش)
محتاجين
يوم بعد يوم شوية يجي بخمسين قرش ( ده اذا كان الخمسين قرش لسه موجودة ما
انقرضتش طبعا في ظل الاسعار التحفة اللي بسمعها ديه)

4- قطن طبي معقم ونضيف من الصيدلية (مش قطن تنجيد تقطعي مرتبتك وتطلعي منها عشان توفري ) اعتقد الكيس المتوسط بخمسة جنيه او ستة جنيه من الصيدليه.

[b]الطريقة بقي المذهلة ان شاء الله:

1-
هتغسلي وشك كويس جدا وتتاكدي انه مش عليه بواقي ميك اب والا تراب والا
حاجة ويفضل طبعا يبقي بغسول مناسب لنوع بشرتك او صابونة طبية مناسبة.

2- هتجيبي عود تنضيف الودان و تحطيه بطرفه بس مش كتير يعني في زجاجة الزيت.

3- هتمشي علي اثر الحباية (انا بتكلم عن اثر الحبوب مش الحبوب نفسها الحبوب ماليش دعوة بيها انا بتكلم عن الاثار السخيفة بتاعتة الحبوب)
هتاخدي عود الاذن ده اللي عليه زيت وتمشي علي اثر الحباية تمسي عليه كده بالراحة وتعملي الموضوع ده مرتين في اليوم ويفضل لو يكون بعد وضوؤك لصلاة مثلا عشان الوضوء اللي بعده تشطفي وشك من الزيت
ومش من اول يوم تعملي مرتين
لا اول
يوم تعملي مرة علي خفيف كده وتشطفي بعد ربع ساعة ولو عدت علي خير تاني يوم
تزودي المدة وتكرري الموضوع بس ما يزدش في اليوم عن مرتين او تلاتة
احتياطي برضه.
وانتبهي قوي لنقطة مهمة هحطها بين فاصلين لاهميتها

الا وهي ان من مكان لمكان تغيري الناحية اللي دهنتي بيها عشان لو فيه بكتيريا لسه موجودة في مكان ما تتنقلش للمكان التاني.
يعني دهنتي بناحية مكان حباية تغيري العود او تقلبيه و تبليه زيت من المكان التاني وتدهني بيه مكان الحباية فهماني.

النقطة التانية المهمة اللي بتخلي الوش رايق ومنور ومفيش اثار لحب الشباب والا غيره
هي
تونيك البقدونس
وده سهل جدا

هتاخدي البقدونس شوية مثلا لو متقطعين يملوا مج شاي وتحطي مجين ميه
وتسيبيه يغلي لمدة عشر دقايق كده بالكتير لحد ما الميه تخضر
وما تزوديش ميه علي الخليط
وسيبيه يبرد كويس جدا وبعدين حطيه في زجاجة نضيفة في التلاجة وكل ما تستعمليه دخليه تاني التلاجة عشان ما يحمضش (زي الطبيخ البايت اللي بتاكليه لعيالك لما تكوني مكسلة)
وبقطنة نضيفة تلات اربع خمس ست سبع مرات في اليوم تمسحي بالقطنة وشك كله مش مناطق الحبوب بس
و مناطق الحبوب زي ما متفقين مش هننقل القطنة عليها ونوديها مكان تاني هنغير القطنة من مكان حباية لمكان حباية
لان القطنة ما بتكدبش وهتنقل العدوي برضه.

وملحوظة مهمة

ما نعملش الزيت والتونيك بتاع البقدونس في وقت واحد
بمعني انه لو الوش مدهون زيت بلاش ندهن حاجة تانية لحد ما نشطف الزيت فاهمين والا مو فاهمين.
وما نطلعش في الشمس والا بالزيت المدهون والا بالتونيك عشان ما نضرش بشرتنا

انا بشرتي مختلطة دهنية
وحساسة بشكل مستفز جدا
والحمد لله رب العالمين كان عندي مكان حبايتين كده قارفني في عيشتي وكنت
دايما بوقف الكريمات اللي بتشيل الاثار عشان كانت بتنشف مكانها جدا
ولكن
بفضل الله تعالي راحت الاثار بنسبة 70% في تلات ايام بالوصفة السحرية ديه.

السوال المعتاد
اوقف الاستعمال امته
وقفي استعمال الزيت والتونيك فورا لو جلدك تحسس له والا حاجة لاقدر الله ولو حتي من اول مرة ولكن باذن الله مش هيحصل كده.
ونوقف استعمال الزيت اول ما تلاقي نتيجة مرضية لكي
و تونيك البقدونس جميل جدا وطبيعي ومالوش اضرار
ياريت لو تواظبي عليه ولو مرتين تلاتة اسبوعيا وشوفي الفرق في بشرتك ازاي
خاصة لو دهنية.

انا كده خلصت الرغي بتاعي النهاردة

[/size][/b]

» للتخلص من الهالات السوداء
» طريقة للتخلص من شعر الوجه نهائيا
» للتخلص من الغازات والانتفاخات نهائيا باذن الله