حدوتة مين عايز بوسة

حدوتة مين عايز بوسة

كان يا ماكان كان في ارنب صغير اسمه ارنوب

وكان عمال يلعب فرحان لكن ماماته جت وقالت له خلاص يا ارنوب ده وقت النوم

لكن ارنوب ما سمعش الكلام وقال لماماته انا مش جاي لي نوم وكمان عايز اكمل لعب

وفعلا قعد يلعب والمرة دي جه بابا وقاله لو انت مش عايز تنام يبقى خلاص مفيش بوسة لك الليلة

دي لا مني ولا من ماما

واخيرا نام ارنوب في سريره وفجاة سمع صوت صغير بيوشوشه ويقوله

من فضلك اديني بوسة

ارنوب قام من السرير ودور على الصوت فشاف القمر

فبص له ارنوب وساله انت يا قمر اللي عايز بوسة

فجاوبه القمر لا مش انا

ارنوب خرج من اوضته وبص للنجوم

وسالها

انتي يا نجوم اللي عايزين بوسة

فردت النجوم لالا ابدا مش احنا

ولسة ارنوب بيدور على الصوت فشاف المطر

قاله انت اللي عايز بوسة قاله المطر لا مش انا

مشى ارنوب لغاية ما وصل لغابة كبيرة

وشاف فيها اشجار كتيرة فزعق بصوت عالي اوي مين اللي عايز بوسة

الاشجار قالت له بوسة واحنا في نص الليل
ده مش ممكن ابدا كل الناس نايمة دلوقتي وانت يا ارنوب لازم ترجع البيت وتنام انت كمان

وفجاة لقى بومة

سمعت كل كلامه وقالت له انت توهت يا ارنوب وانا اللي حاروحك بيتك
وفعلا خدته وطارت بيه فوق كل الغابة ووصلته لحد البيت

ولما ماما وبابا شافو ارنوب في صالة البيت ولابس البيجامة ومش لابس حاجة في رجله قالو له
انت لسة صاحي يا ارنوب وانت بتعمل ايه هنا ومناخيرك ساقعة خالص

وراح ارنوب اوضته مع ماما وبابا ووصلوه لغاية سريره وكل واحد فيهم عطى ارنوب بوسة على خده وفضل
ارنوب في سريره لوحده وقعد يسمع لو الصوت الصغير رجع تاني بس مفيش صوت
خالص وكل شيء هادي
وفجاة قعد ارنوب يضحك لانه فهم اخيرا ايه اللي حصل
ده هو ارنوب نفسه اللي كان عايز البوسة والصوت الصغير ده كان هو
ودلوقتي هو مبسوط وحينام لانه اخد مش بوسة واحدة لاء ده اخد من ماما وبابا
بوستين على الخدين

خلااااااااااااااااااااااص

» لــــــــــــــــــــــــــــــــــــــــــــــــــــــــــــــو عايز تبقى مبــســـــــــــــــــــــــوط
» حدوتة حلوة ....................
» حدوتة السمكه سمكايه