خطوات تخليص ورق الاستقدام لزوجه والاولاد

بعد ماجوزك قدم الورق واخد الورقه الصفرا هيبعتهالك على الايميل او بالفاكس تقومى تعمليها برنت وتروحى عند المكاتب الى جنب القنصليه وعنوانها فى جاردن سيتى وبصو اسهلكم عشان انا معرفش العنوان بالتفصيل انتو تركبو من الجيزة مكروبصات الى بتروح السيده وتنزلو عند القصر عينى وتمشى اقل من 5 دقايق واسالى الف من يدلك على المكان وممكن برضو تاخدى تاكسى

المهم نيجى بقى لاول خطوة وهى تسجيل النت ليكى ولولادك لو عندك ولاد والورق المطلوب فى المرحله ديه باسبورك ولو ولادك ليهم باسبور لوحدهم يبقى تاخدى باسبورهم وصوره شخصيه لكل واحد فيكم وصورة دعوة الاستقدام الى هى الورقه الصفرا وهنا بقى هتلاقى تفاوت فى الاسعار كل ماكتب بيقول سعر شكل وانا هحطلكم اسعار كل ماكتب وهقولكم افضلهم وارخصهم الى انا وصلتله من خلال تجبرتى

اولا: الفهد نت

تسجيل نت لام 160 جنيه

لابن لو ليه باسبور لوحده 80 جنيه وياجماعه لو ولادك مضافين عندك فى الباسبور يبقى هتدفعى تمن تسجيل ليكى انتى بس

ثانيا :مكتب المصطفى

نفس الاسعار بتاعة الفهد

ثالثا :العربى نت

تسجيل نت لام 180

تسجيل نت لابن لو ليه باسبور برضو لوحده يبقى 90

بصو بقى عايزة افهمكم الفرق فى الاسعار هيبقى فين هيبقى فى تمن التاشيره يعنى الى مزود فى تسجيل النت بيبقى مقلل فىتمن التاشيره وفى مكاتب مزوده فى الاتنين وانا مرضتش اكتبهم لان لقيت اسعارهم اوفر اوى

المهم نيجى بقى لبقيه الخطوات طبعا افضل مكتب العربى نت وده هتعرفو ليه فى الخطوة الاخيرة اوكى

المهم هتدهيم باسبورك وباسبور ولادك والصور الشخصيه والورقه الصفرا بتاعه الاستقدام وتدفعى الفلوس وبيديكى ايصال وتقعدى تسنتى حوالى ساعه ونص ولو وراكى مشوار خلصيه وتعالى خديهم وهيسلمك بعدها الباسبور ومعاه ورق فيه اسمك واسم ولادك وجهه الى انتو رايحين فيها وهيلزقلكم ورقه على الباسبور من برة

نيجى بقى للخطوة التانيه

هتاخدى الباسبورات زى ماقولت وتسالى فين مكتب جامكا وتروحى تديهم باسبورك مع الورقه الى خدتبها من المكتب الى سجلتى فيه نت وصورة بطاقتك انتى بس حتى لو عندك ولاد متدهمش باسبورهم لان الولاد مش ليهم كشف طبى المهم بعد مادتيهم الباسبور والورقه والبطاقه هتقعدى تستنى فى استراحه السيدات هيندهو على اسمك ويدوكى ورقه فيها التحويل للمسشفى الى قريبه نوعا ما لسكنك والورقه ديه يا جماعه مدتها 6 ايام يعنى لو مش عايزة تروحى فى نفس اليوم ممكن تروحى فى خلال الست الايام دول

المهم تاخدى الورقه الى حولوكى بيها وتطلعى على المسشتفى وتعملى الكشف الطبى وبصراحه مش فاكرة هيدوكى النتيجه بعد قد ايه لان اول مره كنت بعمل الاستقدام كان من 3سنين ودلوقتى لسه هروح على السبت باذن الله اعمل التحليل

المهم تيجى تانى يوم او اى يوم يريحك تروحى المعامل المركزيه ومعاكى ورقه النت الى سجلتى بيها وخدتبها من المكتب وتعملى التحاليل والمعامل المركززيه ديه ياجماعه فى التحرير عند الجامعه الامريكيه تقريبا لو سالتى عليها الف مين يدلك المهم هيدوكى ايصال ويقولوك على الميعاد الى تاخدى فيه نتيجه التحاليل

وبعد ماتخلصى ده تروحى تاخدى الورق بتاع نتيجه التحليل بتاع المعامل المركزيه وبتاع المستشفى الى حولك ليها جامكا وصوره قسيمه جوازك وياجماعه مش شرط تكون متوثقه وصورة شهاده ميلاد ولادك وبرضو مش شرط تكون متوثقه وتقدميها للمكتب وتدفعى تمن التاشيرة

وبصو لتمن التاشيرة

فى الفهد نت
230 جنيه لكل باسبور يعنى ليكى 230 و230 لكل طفل من ولادك فى حاله لو كل واحد ليه باسبور لكن لو مضافين عندك هتدفعى 230 بس

فى المصفطى نت
235 لكل باسبور

فى العربى نت
170 لكل باسبور وعشان كده قولتلكم ان العربى نت ارخصهم واحسنهم وكمان معلهوش ضغط

وبعد ماتدفعى الفلوس هيديكى ايصال ويقولك تعالى بعد 4 ايام تقريبا حسب لو دخل فيهم خميس وجمعه عشان القنصليه بتقفل وبعده تروحى تستلمى الباسبور هتلاقى فيه التاشيرة وتخلى جوزك يحجزلك وتوصلى بالف سلامه ياجميله لجوزك